BIBLE AH GAY(TUAI) CHHANDAMNA CHANG CHANCHIN KHA I HRE VE TAWH NGAI EM?

Speaker leh Evan tam tak, gay leh lesbian hnena chanchintha hriltu te chuan tihian an hril thin, “Tunah chuan chhandam I ni tawh a, I gay(tuai) nih I bansan(sim) a ngai, I lesbian(patil) nihna I bansan(sim) a ngai, I bansan(sim) loh chuan vanram I lut dawn lo/ chhandam I ni dawn lo,” an ti thin. Mahse kan Bible ah chiang takin Ethiopia gay Krista chhandamna chang chanchin kan hmu a, chhandam ni turin or vanram kai turin a gay nihna sim tura hrilh a nih thu a lang ve lo a ni.

Tuna kan sawi mek hi Tirhkohte. 8:26-40 ah kan hmu thei a, Philipa leh Ethiopia mi tilreh in biakna kha a ni. Mi zo chuan mi tilreh hi kan ti tawp zel a, Isuan Mathaia 19:12 ah khan mi tilreh chithum an awm thu a sawi a, mihring tilreh chawp ni lo, nu pumchhung atang renga mi tilreh(eunuch) a piang an awm thu a sawi a. Heng nu pumchhung atanga piangte hi ching an ni lo va, theologians tam tak te chuan LGBT te an nih thu an sawi a ni. Clement of Alexandra chuan, “a true eunuch is not one who is unable, but one who is unwilling, to indulge in pleasure” [with a woman]” a lo ti a, tihian a sawi belh leh a, “Some men, from their birth, have a natural sense of repulsion from a woman,” a ti bawk a ni.

Philipa biakpa hi engtin nge born eunuch (born gay) a ni tih kan hriat theih? Mi tilreh dang an ni thei lawm ni? kan ti mai thei. A chanchin in ziah danah chuan, Jerusalemah Pathian be tura kal haw lam a nih thu kan hmu a. Thuthlung hlui hunlai atang tawhin Juda te hian mi tilreh te hi an outcast treat a, Deu 23:1 ah chuan, “Mi, a tilmu keh leh a zahmawh tan chu LALPA mite pung khawm zingah an tel tur a ni lo,” a ti a. Mihring tilreh chawp te reng reng hi Lalpa mite biaknaah tel phal an ni ngai lo, mahse Philipa biak Ethiopia hi chu mipui Pathian biakna hmun ata haw lam a nih angin, born eunuch(born gay, tilreh chawp ni lo) a ni tih kan sawi thei a ni (Tirhkohte thiltih hunlai pawh hian Juda te hian an kal phung pangai kha an la bawhzui reng a ni).

Juda ho khan outcast treat mahse Isua thiha thawh leh hnu chuan Juda leh Jentail  bik a awm tawh lo a, Krista chhandamna chanchintha chu mitin tan, born gay tan, Juda tan, Jentail te tan a lo ni ta vek a ni. Ethiopia gay haw kawngah Isaia ziaka Isua torhna thu a chhiara, a hrethiam si lo va, Pathianin Philipa chu Ethiopia gay hnena kal turin a hrilh a nih kha. Tichuan Krista chanchin chu hrilhin Ethiopia gay chuan Isua chu a ringa chhandam a nih thu kan hmu a ni. 

Tirhkohte thiltih.

8:34 Tin, mi tilreh chuan Philipa a bia a, a hnenah, “Zawlneiin heng thu hi tu thu nge a sawi, ama thu nge mi dang thu? ka zawt a che,” a ti a. 

8:35 Tin, Philipa chuan a sawi a, chu Pathian Lehkha thu chu a bulah a tan a, a hnenah Isua thu a hrilh a.

8:36 Tin, kalkawnga an kal laiin tui eng emaw an thleng a; tin, mi tilreh chuan, “En teh, heta hi tui a awm, baptisma channa tur engin nge mi dal kher?” a ti a. Philipa chuan, “I thinlunga I rin takzet chuan I chang thei e,” a ti a. Mi tilreh chuan, “Krista chu Pathian fapa a nih ka ring e,” a ti a.

8:38 Tin, tawlailir chu a dintir a, an pahnihin, Philipa leh mi tilreh chu tuiah chuan an zuk kal dun a; tin, Philipa chuan ani chu a baptis ta a. 

8:39 Tin, tui ata an chhuah chhoh veleh Lalpa Thlarau chuan Philipa chu a la bo ta a; tin, mi tilreh chuan ani chu a hmu leh ta lo, hlim taka a kal tak zel avangin.

He tah hian tunlai speaker thenkhat te angin gay nihna sim turin a tir ve tlat lo. An nihna chu Isua sawi tawh angin pawm a ni a, chhandam an nih ve zia pawh kan hmu bawk a ni. 

Kristaah chuan Juda mi leh Jentail mi pawh pumkhat an nih angin an hunlaia an outcast treat thin born gays te nen pawh pumkhat vek an ni. Galatia 3:26-28 ah chuan, “Krista Isua rin avangin Pathian fate in ni vek si a; in zinga Kristaa baptisma chang apiangte kha Krista chuan in inthuam tawh si a. Chutah chuan Juda mi a awm theih loh va, Grik mi pawh a awm theih hek loh, chutah chuan bawih a awm theih lo va, bawih lo pawh a awm theih hek loh, chutah chuan mipa leh hmeichhia pawh a awm theih loh; Krista Isuaah chuan in zain pumkhat in ni si a,” a ti a ni.

Pathian hian gay, lesbian, bisexual, straight etc… Juda mi, Jentail mi…min thlei lo. Kan za in kan nihna ang angin min pawm veka, min chhandam vek a ni. Mi tupawh Isua aringtu chu CHATUANA NUNNA A THLAWNIN A PE ZAWK A NI. Vanram I kai nan I gay tawh tur a ni lo, I lesbian tawh tur a ni lo, I straight tawh tur a ni lo tih hi chu belh chawp mai a ni. Kan bible ah chutiang a awm ve lo. Isua chuan, 

Johana 3:15-16“tupawh a ring apiangin amah avanga chatuana nunna an neihna turin. Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan,” a ti mai zawk a ni.

I nihna ang ang khan Pathianin a pawm che a ni. Isua chhandamna hre chung renga ring duh lo kan ni hlauh dah a nge! A ring duh lo tu chantur erawh rapthlak tak a ni. Lalpan malsawm che rawh se. Amen.