Isuan mi sual te tana a
thiha a thawh leh hnu, vana a chhoh hma khan a zirtir te hnenah thu chah
a nei a, pakhat zawk chu Thlarau Thianghlim lo thlen hma loh Jerusalem a
awm reng tura a tih thu a ni a, pakhat leh chu chanchintha hril a ni.
Mark 16:15-16 Tin, an hnenah, "Khawvel zawng zawngah kal ula, thil siam
zawng zawng hnenah chuan Chanchin Tha hi hril rawh u. A ringa baptisma
chang chu chhandamin an awm ang a; a ring lo erawh chu thiam loh changin
an awm ang.
Isuan, hril tura min tih chanchintha chu chu eng nge
ni? A tawi zawnga sawi chuan misual nang leh kei thihna tura thi Isua
kha thihna hnehin a tho leh tawh a, mi tupawh Amah ring apiangin
ngaihdamna changin chatuana nunna a thlawna pek an nihna hi a ni. Chu
thu chu Isuan thleibik neilova mi zawng zawng hnena hril turin a zirtir
te a chah a ni.
Chhandamna chanchintha chu mi tupawh hria a
ring/pawm te chuan ngaihdamna/chatuan nunna an hmuh tur thu hril tir kan
nih laiin thu hriltu tam tak te hian kan belh fo thin chu , " i chu ti
kha tih loh chuan, i sual te i kal san phawt loh chuan, gay atang
straight ah i in let loh chuan vanram i lut dawn lo" kan ti a, Isua min
tirh dan leh hrilh dan nen in persan khawpin mahni ngaihdan belhin
vanram luhdan kan hril thin a nih kha. Belh chawp kan puan avanga meidil
tla ta mi eng zat tak awm tawh ang maw! An thisen man kan la phur ngei
ang le!
Tirh 8:26-40 kan en chuan Philipa leh Ethiopia gay te in
biakna kan hmu a. Ethiopia gay chuan Isaia ziaka Isua chanchin sawi
lawkna kha a chhiara, a awmzia reng a hre lo va. Pathianin, "gay a ni
emai ka chhandam ve lo mai ang, ka chhandamna chanchintha te hi a hriat
ve a ngai lo," a ti lo, gay a nih leh nih lohvah a buai lo va, a hnena
va kal vat turin Philipa a tir a nih kha. Ethiopia gay chuan a chhiarlai
chu tu chanchin nge, Isaia chanchin em ni?, tiin a zawta, Philipa chuan
Isua chanchin ngei a sawi thu leh Isua chanchin te chu a hrilh a,
Ethiopia gay pawh chuan Isua chu a ringa, ringtu chhandam fa ka ni ta
tih entirnan tuia baptismana hi an chang ngei ngei thin a, Ethiopia gay
pawh chuan Philipa hnenah, "He ta hi tui a awm, baptisma channa turin
engin nge mi dal?," a ti a. Tunlai rawngbawltu tamtak chuan, "Gay(tuai/patil) i
nihna kha sim phawt la, straight ni phawt rawh," an ti ngei ang, mahse
Philipa chuan, "I thinlung zawng zawnga(Isua) i rin chuan, i chang thei
e", a ti a. Ethiopia gay chuan, " Krista chu Pathian fapa a nih ka
ring," a ti a, baptisma chu a chang ta a nih kha. Philipa khan born gay a
ni tih a hre reng awm si a, mahse tun lai angin i straight phawt loh
chuan, gay i nihna i sim phawt loh chuan chhandam ini thei lo vang, a ti
ve lo. A chhan chu maw, mi tupawh hi kan nihna ang anga pawm leh
chhandam kan nih vang a ni. Vanram luhna tur hian thil dang belh bawm a
awm lo, Isua ringtu kan nihna hi a tawk em em mai a ni. Chu chu Isua
zirtirdan pawh a ni.
Hmanlai Juda Christians te leh Jetail te awm
dan hi tunlai LGBT(Tuai/ patil) leh straight thenkhat te nen hian khaihkhin ta ila.
Juda ho khan Jentail Christians te kha an zinga tel tir an duh loh zia
leh ui ang leka an enzia kan hre vek a. An zingah tel tir an duh lo, an
Juda awm dan anga awm tir phet an tum a nih kha. Mahse Paula khan engtin
nge a sawi? "An ni(Jentail) pawh Juda te ho ang bawka Isua rinna avanga
chhandam an nih na," a sawi a ni. Chu mi hnuah an bula cheng turin an
pawm leh a nih kha. Chutiang bawkin straight ringtu te hian gays ringtu
te, kan bula an awm ve hi kan duh lo va, kan zinga an inkhawm te hian
kan lo ip thin a ni lawm ni? Mahse Pathian erawh chuan Kristaah thleibik
neilovin min en a, straight an nih avangin a hmangaih zual bik chuang
lo va, in angkhat vekin min hmangaih vek a ni.
Vawiinah hian Gay(tuai/patil)
zingah pawh Christians tam tak an awma, Juda ho anga inla laileng ringtu
ten an pawm duh lo va, mahse Paula thu sawi hi ka han sawi nawn leh duh
a ni, "Gays(tuai/patil) te pawh hi straight te ang tho va, Isua rinna avanga
chhandam an ni," tih hi. Paula khan Petera a hauh khan, "Jentail te chu
engvanga Juda ho anga awm luihtir kher i tum?," a ti a nih kha. Gays te
chu engvanga straight te anga awm tura zirtir lui tlat nge kan nih le?
Juda mi kan nih avangin Jentail te ai that bikna eng nge kan neih le?
Straight kan nih avangin gays te ai that bikna eng nge kan neih le? That
bikna reng neilo te kan ni. Mi tupawh hi Isua rinna avang chauhva
Pathian hmaa ngaihdamna chang kan ni. Mahni thiltih fel avanga thiam
chang thei tumah kan awm lo, tih Paulan chiang takin min hrilh a nih kha
maw! Isuan, eng nge ti tura min tih?
Mi zawng zawng hnenah a
chhandamna chanchintha, rin avanga chhandam nihna thu lawmawm tak hi,
hril turin min ti a ni. Mahni chauhva vanram kai hi Pathian duhber a ni
lo, mi zawng zawng hi a hnenah lo thleng vek se a duh a ni. Gays(tuai/patil) te kha
straight ah va siam rawh u, a ti lo va, hnamtin hnenah ka thu hriat tir
zawng zawng che u hi hrilh ula, ka zirtirah te va siam rawh u, a ti
zawk a nih kha(Mt.28:19). Isua ringtu, thu zawmtu diktak nge kan nih a, A
thu belha mi tamtak kawngdik lo va hruai tu? Isua chanchintha min hril
tir, diklo taka kan hril man chu kan la hmu ngei ang. Ti tura min tih
ang nga a chanchintha hre lo te hnena hriltu i ni zel zawk ang u. Lalpan
malsawm che rawh se. Amen.
0 Comments