Mizoram a YMA (Young Mizo Association) , MZP (Mizo Zirlai Pawl), MHIP (Mizo Hmeichhe Insuihkhawm Pawl) leh MUP (Mizo Upa Pawl) te chuan Patil leh Tuai (LGBT) te hnawh kian tum leh siam that theih beisei in hmalak an tum a. An thil tum hi anmahni lama han thlir chuan thil tha tak angin a lang thei a chumi bakah thahnem ngaihna vanga ti an nih kan ring a. LGBT chhungkua an huat leh hmuhsit vanga ti chu an nih kan ring hauh lo. Mahse, chutihrual chuan LGBT te hi an hriattiam loh vang leh duh thlanna leh awm uchuak duh vanga awm ni anga ngai kan nih hlawm hmel tih hi ngaihdan a awm a. Straight lo te hi siamthat theih anga ngai kan tam hle bawk tih hi a chiang bawk a ni. Straight atang homosexual (straight lo) ah in leh han tum ve chhin hlawm ila, a theih leh theih loh chu kan hrethiam thei maiin a rinawm.
Ram changkang zawk te leh Kristianna a puitling zawk te leh upa zawk te chu LGBT chungchang ah hian an lo buai ve nasa tawh thin hle a. Tun hma atang tawh in Doctor te pawn siam that theih an beisei a, Psychologist te pawn an enkawl hial thin a ni. Chung hun lai chuan homosexuality hi natna chi khat-ah an ngai a, tihdam an lo tum fo tawh thin a ni. Scientist te pawh an lo buai hle thin a, a chhan leh vang hi an chhui nasa hle. Tin, scientist ten Hetorosexual (Straight) leh Homosexual (Straight lo) ho te thluak danglamna pawh an lo hmu hial a. Hemi chungchang hi chu post dangah kim chang zawk a hre duh tan hetah hian click rawh le.
Tichuan, ram changkang zawk te pawn an lo bei ve nasa hle a, Rehab kan tih ang te LGBT te tan an lo siam tawh thin a, mahse an hlawhchham chiang hle a ni. LGBT te pawn straight nih hi an lo chak ve nasa in homosexual nih hi an duh bik lova, hrehawm an tih em avangin heng rehab ah te hian an lut nasa thin em em a ni. An chhungte pawn an nihna hi an duh loh pui em avangin an fate emaw unaute chu heng rehab ah hian an luh tir thin bawk a ni.
Chutiang ang rehab (anti gay) LGBT ho te siam that tumna hmun lar tak EXODUS INTERNATIONAL (Ex gay Ministry) chanchin tawite han sawi ila.
EXODUS hi non-profit, denomination zawng zawng tan hawn a ni a. Pathian thu in LGBT kai hruaiin, siam that beiseia din a ni. He organisation hi kum 1976 daih tawh khan din a ni. Exodus khan chung hun lai chuan ministry 250 lai USA ah leh Canada ah te a neih bak ah ministry 150 vel ram (country) 17 vel ah a lo nei bawk a ni. An thahnem in an lian hle. Exodus khan eng denomination tan pawh hawn ni mahse a hruaitu te chu Protestant leh Evangelical denomination an ni hlawm a. Exodus International atang hian Exodus Global Alliance pawh hi 1995 kum khan an din ta a. Exodus Global Alliance hian USA pawn lamah hna an lo thawk ve thung a ni.
Exodus in hma a lak dan te leh Pathian thu te, leh thil chi hrang hrang a LGBT te siam that a tum dan te chu hemi post ah hian kan tarlang lo mai anga, amaherawh chu an lo bei nasa a ni tih chu an ministry tam dan ah pawh hian a hriat hle a, January 2012 khan Exodus International President - Alan Chambers chuan GCN (Gay Christian Network) conference ah chuan tihian a sawi a "Ka tawn tawh mi tam zawk, mi tam zawk ka tih hian 100% ah 99.9% ka tihna a nia, heng 99.9% te hian an sexual orientation - homosexuality hi a thlak danglam lo" tiin a sawi a. Tichuan an slogan "Change is possible" avangin thupha a chawi a ni.
Tin he reparation therapy ah hian mi tam tak beiseina lian tak neiin an lo lut tawh thin a. Kum tam tak an hun leh tha sengin an lo lut a. Mahse siam that a hnek in tam tak nun alo chhiat phah tak avangin Exodus chuan pawi a tihzia sawiin, thupha pawh LGBT te hnenah a chawi nghe nghe a ni. Exodus hi kum 2013 khan thiah/tih tawp a ni ta hial bawk a ni.
Ram changkang hmasa te pawhin LGBT (tuai/patil) chungchang an lo zir nasa in an lo bei nasa tawh hle a, an hlawhchham tawh hial bawka, kei ni hmanni lawka lo harh thar ve mai te hian hma lak tan chu kan tum a ni a, LGBT te tana thil tha tak a nih kan beisei a, mahse Human Right bawhchhe zawnga chetna engmah a awm loh kan beisei hle bawk a ni. Chhiatpuina aiin thatpuina a chhuah theih nan, Lalpan kan za atan he hmalak tumna hi mal min sawmsak rawh se. Amen.
0 Comments