TUAI LEH PATIL (HOMOSEXUAL) TE BRAIN SCAN CHUNGCHANG :

TUAI LEH PATIL (LGBT)

te hian an sexual orientation-ah hian duhthlanna an nei em? An duhthlanna a ni nge nilo mithiam te leh researchers ho ten Tuai leh Patil (Homosexual) te brain scans-a an hmuhchhuah chungchang han en zuai ila a tha awm e.


Mi nawlpui te ngaihdanah chuan kan taksa a serh nen a in mil thlap thlap in thluak te, duhzawng te hi awm turah hian kan han ngai tawp mai zel a. Hei hi hriat tlem vang leh tuai leh patil (LGBT) te nihna va hriatthiam pui loh vang a ni mai zawk lo maw!!

Kan serh hian mipa nge hmeichhia kan nih tih hi chu a tilang meuh mai. Mahse chumi rual chuan kan serh nen a in mil vek hian mihring thluak hi a lo awm lo ve thei a ni tih kan hre ngai em? Nu pum chhungah naute tam tak chu thil kal fel loh avangin naute ah chuan rual ban chiah lohna a awm thei a ni tih hi chu kan hre theuh awm e. Tuai leh patil (LGBT) te pawh hi chutiang ang deuh chu a ni ti ila kan sawi sual lo awm e. Kan mithiam ten sexual orientation hi thil zir chawp leh, environment avang te, social influence avang te a awm nilovin biology lam a lo nih zawk zia an hmuchhuak ta tlat mai a ni.

Tawng huat thu suh ah piansualna chi khat han ti mai ta ila a pawi awm love. Piangsual tam tak an awm a, chi hrang hranga piangsual te, an piansualna kha duhthlanna a ni hauh lova, sim theih thil a ni bawk lo. Pathian erawh chuan a tidamin a siam tha leh thei na meuh mai, mahse Pathian hian piangsual zawng zawng hi a siamtha in a tidam kher si lova. Damlo zawng zawng an lo damin, mithi zawng zawng a kai tho si lova, chuvang chuan tuai leh patil (LGBT) te hi an thil tih theih loh, Pathian chauhin a tih theih ah hian kan lo phut sang lutuk mah mah a ni lo maw?

Tichuan, tuai leh patil kan LGBT member thenkhat te inthlak a, mihring dan pangai anga nupui pasal nei ta te an awm a, mahse an chhungril takah eng feeling nge an thuhruk erawh kan ngaihtuah zui ngailova, chutianga nupui pasal te an neih ve avang chuan an inthlak angah kan ngai hmiah thin a, tin, lo inthlak ta te pawh an awm mahna, mi chi hrang hrang kan awm angin Bisexual te chuan an kaltlangpui lui thei ve tho bawk a ni, chutihrual chuan nupui pasal mihring dan pangai anga innei a, fa te hial nei tawh te zingah hian an nihna diktak, chhungril tak mai inthlak miah si lo te pawh a ruk a kan hriatpui hi an tam em em a, chhungril khawharna leh hlimna tak tak nei lovin hun an hmanga, nun lem, (a dera nung) in an nunga an lainatawm em em a ni.

Mihringin mize hrang hrang leh talent hrang hrang kan neih ang bawk hian, sexual orientation  ah pawh hian nghet bur  leh tlem a sawi zawi theih deuh te an awm thei a. Heng mi thenkhat sawi zawi theih ang chi te avang hian a nghet bur ho hian an thei ve tura kan ngai hi chu thil mawl thlak tak a ni. I sexual orientation kha straight diktak nghet bur chi kha lo ni tase, i sexual orientation kha han thlak tum lawk teh? I thei ang em? I anpui chu i va ngaizawng in i va hmangaih thei ang em? I thei mai bik lovang. I ten viau zawk lo maw? Tuai leh patil (LGBT) te dinhmun chu tikhan i hrethiam deuh mahna. Sexual orientation inthlak anga in sawi emaw inthlak anga kan ngaih tam tak te pawh hian an sexual orientation diktak an pholan ngamloh vangin an thup mai zawk a ni.

Researchers te chuan tuai leh patil (LGBT) family a brain scans an neihna a an hmuhchhuah han sawi ta ila. Tuai leh patil (LGBT) family huang chhungah mi tam tak brain scans an nei a. Chuta an hmuhchhuah chu han sawi dawn ila. Mipa leh hmeichhe thluak hi a in ang lova. Tin, a thawhdan te pawh a in anglo tih kan hre theuh awm e. Amaherawh chu researchers te chuan mipa pangai leh homosexual hmeichhe thluak a in ang bik a, hmeichhe pangai leh homosexual mipa thluak a in ang bik bawk tih hi an hmu daih a ni. Serh leh thluak a in persan a nih chu. Tihluih leh duhthlanna chu nise heng thluak a danglamna awm hi an hmu bik hauh lovang.

A hnuai ah hian brain scans lem kan tar bawk a. Brain scans chungchang hre chiang duh tan National Geographic News Website ah leh scientific american website ah chhiar tur in a awm. A hnuai lamah link kan dah e.

http://www.scientificamerican.com/article/study-says-brains-of-gay/

Link one: National Geographic News

Link two: Scientific American