LALPAN, TUAI PAWN “THING RO KA NI TI SUH SE” A TI

Isaia 56: 3-5Tin, ram dang mi, LALPA zawmtu chuan, 'LALPAN a mite lakah mi tihrang ngei

ang,' ti suh se: mi tilreh chuan, 'En teh, thing ro ka nih hi,' ti hek suh se. Ka chawlhnite serha, ka lawmzawng thilte thlanga, ka thuthlung pawm tlattu mi tilrehte chungchang thu-ah chuan LALPAN heti hian a ti si a: An hnênah ka in chhûngah leh ka kulh chhûngahte chuan fanu leh fapa neite ai mah chuan hriat rengna tha zawk leh hming tha zawk ka pe ang; an hnênah kumkhaw hming, tihboral tawh loh tûr ka pe ang,' tiin.

Kan Bible chang tarlan bung kan chhiar chuan Lalpa chhandamna hi A mi Israel tan chauh a nih loh zia leh midang, Amah ringtu te zawng zawng tan pawh a nih ve zia sawina a ni a. Mi tam takin hnamthlan Israel tan chauh emaw an tih laiin Lalpan ram dang mi leh mi tilreh(tuai) te tan pawh a nih zia a rawn sawi lang bawk a ni.

Engtin nge helaia mi tilreh hi tuai tia dah/ sawi nge ka nih? Tlemin sawizauna nei leh ila. Thenkhat tan chuan kan sawi ngun molh molh tawh lutuka nin-awmah a kal mai thei, mahse sawi nawn zel a ngai si a. Isua khan mi tilreh chithum an awm thu a sawi a, a pakhatna chu Nu pumchhung atanga chutianga piang reng an ni a, a dang chihnih te kha chu mihringina til-reh sak te an ni. Mathaia 19:12 Mi tilreh, an nu pum chhung ata chutianga piang rengte an awm a; mi tilreh, mihring kuta rehte an awm bawk a; mi tilreh, van ram avanga tilreha insiam chawpte an awm bawk a. Tupawh a pawm thei apiangin pawm rawh se," a ti a. He ta nu pumchhung atanga hetiang renga piang a sawi hi “mipa zahmawh neilova piang,” tihna nilovin “hmeichhe chunga it-na neilo gay(tuai)” tihna zawk a ni, tih hi mi thiam zawkte sawi a nih mai bakah Myanmar rama American missionary lut hmasaber Judson-a chuan A.D 1835 khan Greek Bible a lehlinnaah he laia mi tilreh hi, “gay(tuai)” tiin a dah bawk a ni. Sap ah chuan “born eunuch” tiin a in dah a, eunuch thu mal hi google chin ila, image ah chuan “tuai/ transgender” ho thlalak a rawn lang hlawm bawk a, hrilhfiah zau leh hran pawh a ngai lo a ni. Isua sawi atang tawh hian, “born gay, piantirh atanga tuai” an awm zia a hriat hle bawk a ni.

A nih Isaia ziaka mi khi born gay an ni tih engtin nge kan finfiah theih ang? A Bible chang chhiar chian chuan mipui inkhawmna hmuna lut thei chin mi tilreh a ni tih a chianga, chumi avang chuan born gay (tuai) a ni tih a hriat theih a ni. A chhan chu til reh sak te reng reng mipui inkhawmna/ Lalpa biaknaah kal phal an ni ve lo a ni.( Deu 23:1 Mi, a tilmu keh leh a zahmawh tan chu LALPA mite pung khawm zingah an tel tur a ni lo). Hei vang hian kan Bible tarlana lang mi tilreh khi born gay (tuai) a ni tih a chianga, Judson-a pawn a Bible lehlinah “gay(tuai)” a hmang ve bawk a ni. 

A chunga kan lo sawi tawh ang khan ram dang mi pawn, “Lalpan a mi te lakah mi ti hrang ngei ang” ti suh se a ti a, chu chang nilovin , mi tilreh(tuai) pawn, “ kei chu thing ro mai ka ni”, in ti hek suh se a ti a ni. He tah hian Lalpan thleibik tu mah a neih lohzia leh a chhandamna huangchhungah hian mi zawng zawng an len vek zia a ti chianga, tuai te pawn, “kei chu thing ro mai ka ni,” in ti suh se a ti a, awmzia chu, “Lalpan min chhandam ve lo, engmah tlak tlai lo ka ni, Lalpa duh loh, hnar ka ni, A mi te zinga leng ve tur atana duh loh ka ni” in ti suh se tihna a ni. Hetianga Lalpa duh loh leh hnar bik ni awm hiala in ngai tuai/patil zingah kan tam em em a, hei hi Setana bumna a ni. Lalpa erawh chuan A mi te a hmangaih leh a chhandam ang thovin a hmangiahin a chhandam vek a ni. Ama in ah zalen taka len phalna a pe a ni. Fa nei te ai maha hriat rengna an chunga a neih bikzia te a rawn sawi lang hiala, awmzia chu Lalpan a ensan mai mai lo va, a ngai pawimawhin  A NGAIHVEN HLIAH HLIAH TIH NA A NI. Tuai/ patil nih avang hian LALPA DUH VE LOH MIHRING ANGA in ngaih tur a ni lo. CHUTIANG RILRU KAN PU  A NIH CHUAN THLAK HMAK TUR A NI. Setana bumna thanga awm reng a hun tawh lo. Pathian hmangaihna kan hriatchian a hun tak zet tawh a ni. 

Mihring te chuan kan dinhmun, kan nihna kan in en a, mahni mit ngei pawha tling lo ten midang kan han hmu tling lo leh chhawnga, tongkam na tak tak te kan han chhakchhuak thina, a bik takin tuai/ patil thu-ah hian kan tongkam hi a hlawk thei hle a, kan kaa chuan “Isua ringtu ka ni” kan in ti fur hlawma, mahse kan nunah Isua nun leh zia reng a lang bawk si lo. Pathianin Kristaah min hmuh ang leh min treat ang hian midang pawh treat ve turin min duh a ni. Hmusit turin min tir lo va, hmangaihna mamawh te hnenah hmangaihna pek leh Krista chanchintha hril turin min tir a ni. Isua thu chah hnuhnungber kha kan theihngilh tur a ni lo. “Va kal ula nangmah ni ang ni ve lo te chu va hmusit ula, tuai/patil te sexual orientation chu va thlak vek rawh u,” a ti lo, “ Hnamtin hnenah va kal ula, CHANCHINTHA VA HRIL RAWH U,” a tia nih kha. Chu chu kei ni ringtu te hian zawm mai tur kan ni. A tirh loh anga thil dang belh chiam zel hi tunlai tong  takin, “A Christ lo” a ni.

Awle, Lalpan tuai I ni emaw, nilo emaw Ama mi-te a hmangaih angin a hmangaih che a, A Fapa Krista zarah Ama fa ah pawh a pawm bawk che a ni. “Kei chu ka tel ve lo vang” tumah in ti tur kan ni lo, Pathian hmangiahna hi kan hai der tur a ni lo. Kan nihna ang ang hian Lalpan min hmangaiha, “Thing ro ka ni,” in ti suh se, a tia nih kha. Lalpan malsawm che rawh se. Amen.