PATHIAN HI JENTAIL (TUAI,PATIL) TE PATHIAN PAWH A NI VE LO VEM NI?

Rom. 4:29-30 Pathian chu Judate Pathian chauh em ni? Jentailte Pathian pawh a ni ve lo em ni? Ni ve e. Serhtante chu an rin avanga thiam chantirtu tur leh, serhtan lohte chu an rin azara thiam chantirtu tur chu Pathian pakhat chauh a nih si chuan, Jentailte Pathian pawh a ni ve ang chu.

Kan Bible chang tarlan atanga kan hriat theih chu tirh Paula te hun lai pawh khan chhandamna thu ah hian an lo buai nasa in inhnialna nasa tak a awm ve reng a ni tih a hriat a. Tin, Juda ringtu hmasa te khan Jentail ringtu hmasa te kha an lo pawm thiam lo em em a, ui anga an lo en thin Jentail te dinhmun leh an dinhmun Pathian hmuha in ang tur hi an ngai ngam lo ti ila kan sawi sual hnem hian a rin awm loh ber awm e. Tu in nge mahni hmuhsit em em te nena in angkhata thawk dun duh bik ang le? An dinhmun ngaihtuah chuan Juda ten Jentail ringtu te an ngai thei lo pawh kha a awm ve tho a ni. Mahse Pathian khawngaihna dan-ah chuan chutianga in thleibikna a awm tawh miau loh avangin an chunga thil thleng chu an pawm a ngai  a ni. 

Juda mi, serhtan ho te khan Pathian thiam chantirna hi an mahni ta bik liau liau ni tur anga an ngaih laiin Jentail ui-cho ang leka an en te pawn Isua rin a zara thiam chantirna an lo hmuh ve chu an lung nih loh em avangin Tirh Paula khan a lo hrilhfiah nasa hle bawk a nih kha. Tirh Paula khan Pathian thiamchantirna hi Juda serhtan te tan chauh nilovin Jentail te tan pawh a nih zia ti hian a lo sawi a,  “Rom. 4:29-30 Pathian chu Judate Pathian chauh em ni? Jentailte Pathian pawh a ni ve lo em ni? Ni ve e. Serhtante chu an rin avanga thiam chantirtu tur leh, serhtan lohte chu an rin azara thiam chantirtu tur chu Pathian pakhat chauh a nih si chuan, Jentailte Pathian pawh a ni ve ang chu.” A nung Pathian hi Juda serhtan te Pathian chauh a ni lo va, Jentail serh tan loh Isua ringtu te Pathian a nih ve zia leh an ni pawh an rin a zara thiam chantirna chang an nih zia a lo sawi a ni.

He ti zawng hian sawi ila, mi hring chi hrang hrang kan awm a, a bik takin chihnih angin  han in sawi phawt ila, LGBTQ an tih a tlangpuia kan hriat TUAI,PATIL te leh straight an tih TUAI,PATIL ni ve lo te an ni a. Straight ringtu tam zawk te hian TUAI,PATIL te hi an hmu sual em em a, an zinga Pathian bia a an awm ve pawh hi an duh lo va, Juda serhtan ten Jentail ringtu te an huat em em ang khan TUAI,PATIL te hi an en thei lo va, Isua ringtu an nih hi an phal ve lo ni hial te hian a lang. Thenkhat kohhran te lah chuan an la phuar hial zui a. Juda serh tan ho ten ngaihdamna leh thiam channa Pathian hnen ata an hmuh khan an serhtan vang em ni? Ni suh e. Isua an rin avang chauhva thiam chantirna chang an ni. Tunlaia straight ringtu te hi straight an nih avanga thiamchantir em ni an nih le? Isua an rin avang chauhva thiam chantir an ni. Thil dang engmah a awm lo! Chu tiang bawkin Jentail ui-cho ang leka an en te pawh kha Pathianin Isua an rin a zarah thiam a chantir ve bawk a ni. LGBTQ (TUAI,PATIL) te pawh hi Pathianin Jentail te angbawkin Isua an rin a zarah thiam a chantir a ni. Pathian khawngaihnaah hian thleibik a awm lo va, Mi eng ang mi pawh (whosoever) Isua ringtu chu thiam chantir an nih thu Bible ah kan hmu nual bawk a ni (John 3:16,18,36). Straight kan ni emaw, tuai, patil kan ni emaw, eng ang mi pawh ni ila, Isua ringtu kan nih a zarah thiamchantir kan ni.

Tirh Paula meuh pawh khan engtin nge a lo sawi? “(Galatia 2:15-16) Kei ni zawng Jentail mi sualte ni lovin Juda mi renga piang kan ni a, nimahsela Dan thiltihte avangin mi thiam changing an awm lo va, Isua Krista rin avang chauhvin thiam changing an awm zawk tih kan hre si a- keini pawhin Dan thiltih avang ni lovin, Krista rinna avanga thiam change kana wm theih nan Krista Isua chu kan ring a ni; dan thiltihte avangin mihring reng reng thiam changing an awm dawn si lo,” a lo ti a ni. 

STRAIGHT te pawh Isua an rin avanga Pathian thiam chantir an nih angin LGBTQ(TUAI,PATIL) te pawh Isua rin azara thiamchan tir an ni ve bawk a ni. Kan Pathian hi Juda serhtan te Pathian chauh a ni lo va, Jentail serhtan loh te Pathian a ni ve bawk a ni. Juda serhtan ringtu ten Jentail serhtan loh ringtu te ngei thei lo mahse Pathianin in angkhata a en miau avangin Pathian en anga Jentail ringtute pawh an lo pawm ang khan, kan tunlai ringtu te pawh hian kan TUAI,PATIL ringtu te pawh hi kan pawm a hun ve tawh a ni. Lalpan malsawm che rawh se. Amen!