SODOM KHA SAME-SEX (TUAI/PATIL) IN LAICHINNA AVANGA HREM A NI EM?

Hmanlai atanga Evangelist te leh pastor tena min lo zirtir thin danah chuan Sodom hrem a nih chhan kha mipa leh mipa in laichinna avang a ni, an lo ti thin a, tun thleng pawh hian chutianga zirtirna chu mi tam zawkte thu hril a la ni. Genesis 19 chhunga Sodom chungchang kha ngun takin han chhiar nawn leh ila, khawiah mah khan same sex in laichinna avanga Pathian hrem an nihna a in ziaklo a ni. Bible chhungah hian hmun 48 lai Sodom hming a chuanga, hrem an nih chhan kha thenkhat tena min zirtir angin same sex in laichinna avanga hrem an nihna pakhat mah a awm lo a ni.

An chanchin tlangpuiah chuan vantirhkoh pahnih Lota inah an thlenga, an khaw mipa, a puia pangin vantirhkoh pawngsual tumna a nih thu kan hmu thei a ni. Khawilai ah mah khan tuai leh patil te sawina pakhat mah a in ziak lo a ni. Vantirhkoh meuh pawngsual an tum laiin Lota chuan a fanu pahnih mipa pawh la mutpui ngai lo a neih thu leh mutpui zawk turin a ti a, Lota khan a khawpui te hi eng ang mi nge an nih a hre bel hle dawn a, tunlaia tuai ang an nih loh zia a chiang hle a ni. Awmzia tak chu Sodom khaw ho kha misual turu lutuk, khawngaihna leh Pathian tihna pawh neilo an nihna a chianga, tunlaia tuai te ang an ni lo tihna a ni. Sodom khaw sualna kha Ezekiela chuan tihian a ziak a,Ezekiel 16:49-50 I laizawn Sadom khawlohna chu hêng hi a ni: Chapona te, eipuar lutuk te, amah leh a fanute nuam tawlna mai mai te a ni a, mi retheite leh tlachhamte chu a pui chuang hek lo. Tin, mi chapo tak an ni a, ka hmâa thil tenawm ti tawh an ni; tichuan tha ka tih angin ka ti bo hlawm tawh a ni," a ti. 

Chapona nuna khat, khawngaihna pawh neilo, hlim hlawpna ringawt ngaihtuah, Pathian duh zawng tih tum hlek lo mihring an ni a, Pathian duh lohber vantirhkoh thlenga pawngsual tum an nihna kha Pathianin a hremna zawk a ni. Khawi hmunah mah same-sex in laichinna avanga Sodom a hremna inziak a awm lo a ni. Kan la awih lo cheu a nih chuan mahni ngei hian chhiar ve bawk ila ava tha dawn em!!

Mi tam tak chuan tihian an tan chhan thin a, Sodom khaw ho pawh mipa, vantirhkoh ho pawh mipa an ni a, chu mi avang chuan same sex inlaichinna duhloh na a ni, an ti thin. Chutiang zawnga lak tur ni ta se tuna mipa ho pawh hi Isua mo(bride) tur an ni vek lo vem ni? Mipa leh mipa inneihna vanramah a awm dawn tihna a nih chu! Mahse kha tiang zawnga mipa leh mipa an ni a lawm, tih ang zawnga hrilhfiah tur a nih loh zia kan chiang tawh ang chu! Bible in an sualna a sawi anga sawi ve mai tur a ni, belh kher hi a ngai lo a ni.

A nih tinge Isua lo kal a hnaih hunah chuan Sodom leh Gomora ang kha a ni ang, a tih si, tun ang hunah pawh tuai leh patil an tam tawh em em hi? Kan ti a ni mai thei. Tuai leh patil ni lo pawh a aia nasa in an pung tho a lawm le. Sodom hun ang chiah khan hmangaihna leh midang khawngaihna kan nei lo tulh tulh a, mahni nuam tih zawng hlir panin kan kalbo va, chapo takin kan awm a, Pathian tihna reng neilo te kan tam tawh em em a ni. Tun hma aiin pawngsual te a tam a, naupang pawngsualna ringawt pawh a hluar ta em em mai a ni. Sodom nena in danglamna vak kan nei tawh chuang em ni le? Tinge hmeichhia leh hmeichhia, mipa leh mipa inlaichinna ringawt chu kan sawi uar chiam tak le? Sodom chungchangah pawh in ziak hlei lo phuahchawp thu chu la in, Pathianin Sodom a hrem chhan chu tuai leh patil te vang a ni, kan tih ve ngawt thin le?

Sodom khaw chungchangah hian same sex in laichinna avanga hrem an nihna a awm loh mai bakah, same sex inlaichinna pawh a awm hek lo a ni. Ezekiel ah pawh an khawlohna chiang takin a ziak a, tin, Jude 7 lamah pawh tuai leh patil (same sex) lam nilovin vantirhkoh pawngsual an tumna zawk kha hmuh a ni. Bible ngaina mi kan nih chuan a bung pum hian zir nawn leh theuh ila, diklo taka min lo zirtir avanga kan gays christians te nun kan nekchepna hi i ti tawp tawh ang u. Mi tupawh Kristaah chuan mi zalen a ni a, in angkhat vek kan ni. Tumah hi fel bik kan awm lova, LGBT an nih avanga hmuhsit tur an ni lova, straight an nih avangin hmuh sual bik tur pawh an ni lo a ni. Kristaa unau kan nihna zawk chu thlirin in hmangaih dial dial tura zirtir kan ni. Lalpan masawm che rawh se. Amen.