NU LEH PA TEN KAN FATE CHUNGCHANGA HRIAT TUR PAWIMAWH

LGBT chungchang hi kan Mizo society ah hi chuan ala lar lo hle a, nu leh pa te zingah ngat phei chuan a hria hi sawi tur kan awm mang lova, kan hriat loh chhung hian thenkhat te chuan an fate nun an lo chan nual tawh a ni. Chutianga nun chan phah hial khawpa beidawnna kan fa te chunga kan thlen thin chu eng chu nge ni? Kan chhungkaw zingah LGBT chungchang hriat loh lutuk avanga kan fate nun kan chan ve loh nan kan fate hi eng ang mi nge an nih kan hriat chian nan tlem sawi lawk ila. 

Pathianin mipa leh hmeichhiaah mihring a lo siama, tha a tiin mawi a ti hle a, A thil siam zinga mipa leh hmeichhia avang khan, "A tha lutuk", a lo tih phah hial bawk a nih kha! Chu hmeichhia leh mipa chuan fa te an rawn nei zela, inthlah pung zelin mi dum, mi var, mi sang, mi tawi, mi thau, mi cher, chi hrang hrang kan lo awma, chung mi hrang hrang te zingah chuan sexual orientation an tih, midang chunga sexual attraction neih dan in ang lo hrang hrang kan awm leh bawk a, hei hi Pathian ropuizia tih lanna pakhat a ni ve bawk a ni. Chutianga danglamna nei theuhva siam leh piang kan nihna hi kan in hriatthiampui loh avanga fa te dinhmun derthawng taka dah nu leh pa te pawh kan tam hle a, in anglo tak tak kan sawi mek orientation khi sawi zawm dawn ila. 

Kan pianpui nihna mipa leh hmeichhia hi biological sex an lo ti a, mipa leh hmeichhia-ah chuan hetiang hian kan awm thluah mai a ni. 

(1) Heterosexual- hengte hi straight tih pawn an ko va, mahni opposite sex duhtu te an ni a, same sex duh theilo te an ni. 

(2) Homosexual- Hengte hi mahni opposite sex duh theilo an ni a, same sex chauh duh thei te an ni. Lesbian leh gay te hi an ni. A pa chi leh a nu chi an awm bawk a ni. 

(3) Bisexual - hengte ve thung chuan mipa leh hmeichhia an nih pui ve ve thei thung a ni.

(4) Asexual - Hengte ve thung chuan mipat hmeichhiatna lam feeling an nei lova, relationship-ah erawh an awm ve thei tho a ni. 

(5) Pansexual - hengte hi chuan a chunga kan sawite zawng zawng khi duh thei vekte a ni. 

Awle, nu leh pa te zingah ngei pawh hian tamtak chu homosexual ni ve tho, inthup tlat te pawh an awm a. Society sawichhiat leh sawisel hlauh vang leh chhungte vanga mahni nihna (mahni sexual orientation) lo puia nupui pasal nei tam tak an awm a, nun chhungrilah hrehawm ti takin an nun chu an nupui pasal te bulah an hmang a, an lainat awmin an khawngaihthlak hle a ni. Chutih rualin heterosexual nu leh pa thenkhat te pawn fa gay (patil/tuai) nei an awm nual a, mahni fate zinga hetiang an awm hi kan duh lo viau awm e. Kan fate ngei pawn gay nih chu an duh bik hauhlo mahse siamtu Pathian siam dan (Mt.19:12 Mi tilreh (Eunuch) nu pum chhung atang chu tiang renga piangte) a nih miau avangin tihdanglam theih a ni lova, hrehawm tichungin an nih dan ang angin an awm ve tawp mai a ni. Kan fa te nihna dik (tuai, patil) kan hriat loh vang leh keimahni ang thova straight ni ve emaw ti a mahni ngaihdan leh duhdan ang thlapa fa te awm tir tumin, an awm dan thlaksak kan tum luat avanga hrehawm ti a, mahni nun hial la ta mai an awm phah bawk a ni.

Kan fa te hian an chhungril nuna an buaina te ngaihthlaksakna chang hretu nu leh pa an mamawh hle a ni. Diktak chuan nu leh pa ten kan fanu, fapa patil/ tuaite chungah pressure kan pek nasat thin em avang leh an nihna kan hriatthiampui loh luat avanga mahni nunna la duh ta mai leh nun hrehawm ti taka hmang hi an tam hle a ni. Midangte hmuhsitna mah tawrh hrehawm tih tawh nak alaiin mahni chhungte lehzelin mi an han hriatthiampui duh tlat si loh hi chuan bei hi a dawng thin teh a sin. Kan fa patil leh tuai te hian nu leh pa hmangaihna leh chhungte pawmpuina, support-na hi an mamawh hle a, nu leh pa ten i hre thar ang u. 

A chunga orientation kan sawite khi sawi zawm leh lawk ila, nihna pakhat theuh khi thlak danglam theih a ni lova, kan pianpui nihna diktak a nih miau avangin eng ang pawn thlak tum mah ila a theih loh a ni. Fa nu , fa pa gay I nei a nih chuan zahpui lo la, an nihna ang ang khan pawm la, support bawk la, I hmangaihna an chungah ti lang nasa zual zawk rawh. Chuti lo chuan gay a nih avangin diklo leh hmangaih ni ve lo angah an in ngai a nga, nun beidawng takin an nun in chan ve palh ang tih a hlauhawm a ni.

Nu leh pa te pawh, in fate zingah gay an awm avangin zak suh u, Pathian thilsiam zahpui kan nih dawn mai bakah mahni fa pawm lo, mahni leh mahni in pawmlo kan ni zawk dawn a ni. Thlak theih emaw kan la tih cheu chuan Straight kan nihna atangin  gay nih han tum ve chhin teh u, in thei bik hauh lovang. In theih hunah chauh in fate chu thlak in tum zawk dawn nia. Tichuan in hlawhtlin loh chhan in hria anga, in fate nihna dik chu inlo pawm thiam ve dawn nia. Kan fa nu, fapa gay te hi an awm danah judge mai lovin an thiantha takah tangin an nihna dik hriat thiamsak i tum hmasa zawk thin ang u. Tichuan Pathian kutchhuak mawina leh ropuina hi kan lo hmuthiam ve bawk anga, chu chuan hlimna min pe bawk dawn a ni.

Lalpan malsawm che rawh se.Amen.