CHAKLO ZAWKTE HNEHCHHIAHNA HI TIH TAWP A HUN (STOP BULLYING)!!!

Mihring pakhat kan nihnaah dikna chanvo kan nei theuhva, tumah hi hmusit leh hnehchhiah bik tur kan ni lova, mahni theuhvah dikna chanvo nei kan ni vek a ni. Chutih rualin kan dikna chanvo te chu midang nun tih chhiat nana hman erawh phal a ni lova, khap pawh a ni bawk a ni. 

Mihring pakhatina dikna chanvo a neih te hi kan in hlutsak tawn thiam hi a pawimawh em ema, a chhan chu khawvela mihring chengte hi in ang vek kan ni lova, duh dan in ang lo theuh te kan nih hlawm mai bakah, mi chak te, chaklo bik te, mi cherte, mi thaute, mi ngo te, mi hang te, piang sualte, beng chhet te, chhetlo te, huaisen te, dawizep te etc… mi chi hrang hrang kan awm a, kan in hriatthiamsak tawn a ngai vek a ni.  In ang tlang veka en tur zawk kan nih laiin, thenkhat te chuan mahni aia chaklo zawkte tih duhdah leh hmuhsit hi nuam kan ti a, kan tetlai atang renga nu leh pa hnen atanga zirtirna tha kan dawn loh vang nge? Midang tih duhdah nuam kan ti ve hrim hrim zawk? Mahni aia chaklo te tih duhdah leh hmuhsit thu ah hian tlemin sawi duh kan nei a. 

Vawikhat chu ka lenga, kawnga ka awm lai chuan naupang dangte hian mipa naupang pakhat hi an lo tawngkhum chiama, an lo hmusitin an lo ti nawmnaha, chu naupang chu tap chungin an daha, an kalbo san vek a. Naupang bulah chuan, “mama, eng vang nge I tah a? Khang ho khan engtin nge an tih che”, tiin ka zawt a. A ni chuan, “tuaia, hmeichia I nih kha! ti in ka tih dan te an zir a,min chhaih nawm nah thei lutuk," a ti a. Chu naupang tawng chuan ka rilru hi a khawih takzet a. Hetiang hian a ni maw kan Mizo nun hi a lo chhiat tawh, ka ti hial bawk a ni. (Source: Ka Ni Tawh Lo).

Nu leh Pa te hian kan fate hi midang chaklo zawkte hmusit lo tur leh ti duhdah lo tur te hian kan zir tir ngai lo nge? Keimah ni zawk hian kan fa te hmuhah midang hmuhsitna tawngkam kan hmang fo thin zawk? Mipa naupang an ni a, an awm dan a nu emaw a pa emaw ah hian hmuhsit tur leh “tuaia” tih theihna kan nei em ni? Kha naupang kha kha tiang zela a thiante tih nawmnahna a hmachhawn zel chuan mahnia in tih hlum duhna te a rawn nei thei a, mahni leh mahni in huat em emna te, te bik riauva in hriatna te, a future zawng zawng a ti chhe vek thei a ni tih hi kan hriat a hun tawh tak zet a ni. Mahni fa te chanah han in dah ve mah teh u! Kan duh bik a ngem le? Nu leh pa te pawh hian kan fa te hi kan zirtir deuh chu a ngai a ni. Kan fanu te an mizia a pa deuh emaw kan fapa te mizia a nu deuh emaw a nih pawhin an mize pianpui a ni tih hria in engkimah support tur kan ni zawk a sin. Midang hmuhsit ching naupang nu leh pa te pawhin kan fa te hi kan in zirtir a hun tawh tak zet a ni. A nih loh tullo takin miin nun an chan theiin, an future a chhe vek thei bawk a ni.

Kan society ina infiam nana kan hman fo, “I thaibawi lutuk”, kha tiang te chu hmeichhe tih tur a lawm, tih te, “iva tuai ve”, in tih fok fok te kan ching a. Mi nupa in karah kan in rawlha, nuam taka inchhung khawsaknaah in pui tawna an awm laiin “I va thaibawi ve”, tih tawngkam khat kan lo pek hian an pasalte rilru a ti danglam theiin, chhungkaw nuam tak ata in hauhna chhungkuaah kan thlaksak thei a ni. Hetiang tawngkam thlahdah tak kan hman thin, midang tana hlawkna ni lem lo hi chu I hmang lo ngam mai ang u. Kan sawi tawh angin mihringte hi kan in ang vek lova, mi chi hrang hrang kan ni a, chaklo zawkte chu hmusit lova chhawmdawl tur kan nih zawk laiin keini chuan kan hmusita, kan ti duhdaha, kan hnehchhiah zawka, hei hi Pathian duhdan a ni lova, in angkhata in ena in hmangaih taka lengza ho tura tih kan ni zawk a ni. Midang tana malsawmna kan ni theilo a nih pawhin an tan thil thalo thlentu i ni lo ngam bawk ang u!

CHAKLO ZAWKTE HMUHSIT LEH HNEHCHHIAHNA HI KAN TIH TAWP A HUN TAWH A NI.  STOP BULLYING!!!!