TUAI/PATIL NIHNA HI SUAL A NIH LOHZIA LEH DUHTHLANNA A NIH LOHZIA KA HRIAT CHIAN DAN

Tuai, patil sawi rik tawh hi chuan hmuhsitna rilru leh Pathian huat zawng an ni, tih rilruk pu nghal mai kan tam a rinawm a. Dem kan awm hran lo ve, hmanlai atanga min lo zirtir dan a ni miau si a. Tun tumah hian kan hriat zen zen thil nilo, tuai/patil nihna hi sual a nih lohzia leh duhthlanna a nih loh zia te, Pathian siamdan leh straight (tuai nilo) te nen pawha in angkhata hmangaih leh pawm kan nihna sawi tum a ni a. Chhiartu te ngaihdan a nih vek kher loh pawn eng emaw chin chu ngaihtuahna thar a pek thui cheu ka ring a. Thenkhat rilru chu a thlaksak ngei pawh ka ring a ni.

Awle, kan naupan tet  atanga min lo zirtir thindan ang a nih chuan, tuai/patil nih hi sual a ni a, Pathian huat  an ni a, meidil an tla dawn, tih hi a ni fo a. Chutiang kara seilian kan nih miau avang hian tuai/patil leh tuai nilo te rilru ah pawh chu thu chu in tuh nghetin tuai te pawn mahni leh mahni sual leh Pathian duh loh mihring ni anga in ngaiin thenkhat mahni nunna inla hial an awm bawk a. Tuai nilo te tan pawh tuai tenna leh duh lohna a thlen thuk em em a, hmuhsitna a thlen bawk a ni. Tam takin tuai/patil nihna hi, “duhthlanna a ni a, Pathian thu ah an la chian tawk loh vanga hetianga awm an ni,” an tih laiin, thenkhatin, an naupan tet atang mipa bulah / hmeichhia hlir an kawm avanga hetianga tuai ni ta leh patil ni ta anga ngaiin an sawi thin bawk a. Naupanlaia thian kawmte avanga tuai/patil rawn ni ta mai ni ta se, khawvela mihring awm zawng zawng hi tuai leh patil kan ni vek dawn tihna a ni. Mahse kan ni miau si lo va.  Kan naupanlaia kan thiankawmte a zira tuai leh patil rawn ni ta mai kan nih loh zia a chiang hle a ni. Nu pumchhung atang renga tuai/patil dinhmuna piang kan nih avanga tuai leh patil ni kan ni(Mt 19:12). Kan duhthlan vang emaw, thian kawmvang emaw pawh a ni lo,tih hi kan hriat atan ka duh a. Mi tam takin tuai/patil nih hi sual a ni, an tih laiin kei chuan, a ni lo, ka ti a ni. A ni lo, tih chiang taka ka sawi ngam chhan pawh keima nuna a fiah em em vang a ni.

Homosexual (tuai/patil) ka nih ka in hriat hma, kum 13 ka nih hian ka piangthar a, chutih lai chuan ngaihzawng ka la hre lo va. Chung hunlai atang tawhin Pathian thu hi ngaihven ka ni a, ka tuina ber pawh a ni. Engtik hunah pawh thi ila, vanram chu ka ta ngei a ni, tih ka chianga, vanram kai thu ah chuan buaina engmah ka nei lo. Ka buai thinna ber chu ngaihzawng ka lo hre ve ta maw, tih hian ka anpui ngei kha duhna ka nei tlat mai kha a ni. Ka anpui lo chuan min hip lo ti ila ka sawi sual hnem lo vang. Mahni tawkah ngaihtuahna nei leh thil awmdan hre thiam ka ni ve tawh a, mahni anpui han ngaihzawn tak mai chu mak hi ka in ti a, ngaihzawng ka hriat thiam hma, mahni anpui nei ho ka hmuh laia mak ka tihzia leh an mahni ang ka nih ka in rin miah loh laia homosexual(tuai/patil) ka ni tlat mai khan ka ngaihtuahna a ti kal thui a, Pathian hnenah pawh zawhna ka siam fo va, "eng vang kher nge? Eng vanga hetianga min siam nge i nih,?" tih hi ka zawhna lian leh hriat chak em em a ni. He tianga min siam chuan, min hmangaihtu leh min duhtu pawh a siam tel ngei tur a ni, tih hi ka rindan a ni a. Ka rindan ngei chuan hmangaihtu leh min duhtu chu an lo awm ngei zela(homo(lesbian) zingah hian butch(pa chi) leh femme(nu chi an awm). Mi tam tak ngaihdan anga duhthlanna leh Pathian thu hriat loh vang a ni, an tih kha dawt a nih zia leh khatianga sawitu te khan thil hi an hriat chian loh vang leh an chhui ngai lohzia ka rawn hmuchhuak tulh tulh dawn chauh hi a lo ni a. Mahse naupanlai atang tawha patil/tuai thu ah negative zawnga sawina kan lo hriat than fo a nih avangin tuai/patil nih chu ka duh bik hauh lova, “a diklo, sual a ni,” tih rilru min lo tuhna chuan mahni anpui ngaihzawng neih chu Pathian duh loh ang ah min ngaihtira, ka hmangaih em em te pawh then tumin tan ka la a, mittui tlak phah nan vawi tam ka hmang hial bawk a ni. Mahse eng ang pawn tumin tan la mah ila homosexual(tuai/patil) ka nihna chu a reh thei chuang lova, ka duhzawng chu a ngai reng a ni. Pathian thu lamah eng ang pawn kal mah ila a pangai reng a, ruih theih thilte chu Pathian thu avangin ka sim thei veka, engmah ti lo pawn ka awm reng thei a, mahse danglam em em leh mak em em chu homosexual(tuai/patil) ka nihna sim a theih ve loh hi a ni. Sim theih chi ni sela ka simna or tuai/patil ka nih lohna a rei tawh ang, or engtikah mah homosexual(tuai/patil) ka ni ngai lo ang. Tuman tuai/patil nih hi kan duh lo. Kan duhthlanna avanga lo piang kan nih loh angin duh thlanna avanga tumah homosexual(tuai/patil) nilo thei kan awm lo a ni. 

Khawvel ram zau takah hian kei mah ang hi keimah chauh ka awm emaw ka tih laiin tam tak an lo awmin an lo buaipui mup mup ve reng hi a lo ni a, ka tleirawl chhuah hunlai kha internet hun a nih loh angin mahni at in kan ã ve tawp a, hetiang lam chungchang hriat zauna tur awm lo nen, mahni awm awma awm tawp, a ruka mahni a tawrh tlawk tlawk a ni tawp mai. Ngaihzawng ka neih te hian chhungte hriat ka hlau thin em em a, straight te angin zalen takin,"hei hi ka bialnu/bialpa a ni," kan ti ngam ve si lo va, a rukin, hreawm ti takin hun kha ka lo hmang ral ve mai zel a ni. Mahse Pathian hnena zawhna ka siam thin,” engvang kher nge hetianga min siam?” ka tih thin kha theihngilh sakin ka awm lo va, min lo hriatsak renga, a hun a tih kum9 hnuah ka hre ve chauh a ni. Hrilhfiahna min pek lai khan ka phur, rit thin em em kha engtiklai khan nge an bo pawh ka hre lo, ka zang huai a, nuam hi ka ti a, ka hlim em em mai a ni. Pianthar nawn theih ni se chuan ka piangthar nawn leh ka ti ngei ngei ang. Ka phurrit a zang ka tih khan , ka homosexual(tuai/patil) nihna min lak kiansak emaw ti tawk in lo awm ka ring. A teuh lo mai, homo ka nihna chu ka piantirh ata ka nidan ngai bawk kha ka la ni reng a, ka ngaihzawng duhzawng pawh a la ngai reng a ni. Ka feeling kha chu ka anpui chungah a la ni reng tho a ni. Straight ten mahni opposite sex chunga feeling an neih a bo theih loh ang chiah kha a ni. He thu ka sawi apianga ka hriat chhuah chu Tirh Paulan, a taksaa Setana kutthak hnawihna vawithum lai lakkiansak tura Pathian hnena a dil laia, Pathianin , "ka khawngaihna itan a tawk e," a tih kha a ni a, eng ang pawn homo nilo turin dil mah ila, a chhanna chu “No” a ni tawp mai a ni. 

Ka pian hma atang daih tawha min hretu leh eng ang mi nge ka rawn nih dawn tih pawh hre lawk vektu Pathian hian hetiang reng hian min lo siam a nih hi ka ti ve tawp a, chu chu keimaha rinna nghet tak ka neih a ni bawk a. Ka dinhmun hi homosexual(tuai/patil) ni ve lo te chuan in hriat thiam chiah ka ring lo. Heterosexual(tuai nilo) tena in hriat thiamdan tur chuan heterosexual atang khan homosexual ah in leh han tum ve chiah mai ula, a theih lohzia in lo hre ve a nga, chutah chauh chuan eng ang harsatna nge homo te hian kan paltlanga kan tawrh in hre ve mai ang. Sawisel ngam leh sawisel duh pawh in awm tawh lo ang, tunah rih chuan in hriat thiam miau loh avangin min sawisel niber hian ka hria. Mi tamtakin tuai/patil nih hi sual a ni, an tih laiin kei homo ni ve tho hian a nih lohzia ka nuna langah hian sawi ka duh a. Khatia nun beidawng leh mangang taka ka awm hnu, kum9 hnua hrilhfiah ka nih hnu pawh khan hriat loh tam tak ka la nei a, kha tih hunlai kha chuan Pathian chandamna chanchintha hril a pawimawhzia khan min hneh em ema, chutih rualin ka thiante hnenah ngei chuan ka theih ang tawkin Pathianin kan nihna ang anga min pawmzia, Isua ringtu kan nihna chauh hi chhandam fa kan nihna a nihzia te nen ka hrilh thin a, mahse an ni ho chuan an awih lova, an nuih a za mai mai a, thenkhat chuan nuihza siam nan te min hmanga, a hunlai kha chuan a lo na ve thin khawp mai, mahse Pathianin tuar theihna min pe a, min sawisela nuihza siam nana min hman apiangin Isua hmangaihna hi ka feel tulh tulh a, Isua pawh kha min chhandam tura leia a lo kallai khan Pharisai te leh lehkhathiam ho khan an lo hmusita, Pathian fapa a nih an ringlo a, khang zawng zawng kha min hmangaih vanga a tawrh a ni a, mittui tla chungin thiante min hmuhsitna chu Lalpa hnenah lawm thu sawi nan ka hman phah hial a ni. Tichuan ka hun ka hmang ral zela, ka thianhlui ka kawm ve ho te pawh khan min kalsan veka, ngaihzawngte nen lamin min kalsan vek a ni. Mahse engkim hretu Pathian chuan min thlahthlam ngai lova, min kalsantu te aia a let tamtaka tha, rawngbawltu leh Bible lama zirna sang nei thian tha tak tak min pe a, an hnen atangin tamtak ka in zira, Bible thu har tamtak ka zir bawka, Pathian thu lamah chuan mahni tawkah ka in zir nasa in, inrin tawkna pawh ka neih phah hial a ni. Thawkkhat phei chu chhandamna chungchangah inhnialna ropui tak chhandamna bo theih leh theih loh thu ah inhnialna nasa tak kan nei a, kha tah pawh khan Pathian thu nasa takin ka zirbelh a, lehlamte tranchhan thlengin ka zir chiang hi a ni ringawt. Inhnialna ropui atang zir chhuah tamtak ka neih hnuah inhnial chu ka bansan ta a. Zirchhuah tamtak ka nei bawk a. Bible lama mi zir mi tak an nih hlawm avangin ka lo hlawk pui em em mai a ni.

 

Engkim ka tih naah hian Pathian hi ka rawna, ka naupan tet atanga ka lo tih thin a nih angin engkimah hian Pathian hi mahni nu leh pa ang maiin ka lo be thin a, hna thawh ka duh pawhin ka tana hna tha tur ka dil thin a. Hna ka thawh hma chuan kan Kohhran ah hian Bible class a awm a, chu tah chuan ka zir theih ang tawka ka zir hnuah ka chawl a, rawngbawlna te chu kan nei ve thin a. Hna thawh loh tak tak a theih si lohva, Lalpa hnenah ka tana tha tur hna chu ka dil a. Tichuan rem chang tak maiin NGO ah thawh tur a lo awm a, kumkhat ka thawh chhungin hmun dangah workshop na ah te min kal tira, kan awmna hmunah ngei pawh neih a ni thin bawk a, Pathianin tul a ti a ni ang, chu ta tang chuan tunlaia an buaipui em em LGBT (tuai/patil) chungchang te Biological sex leh sexual orientation danglamna te kan zir a. Kan workshop na hmunah mi chi hrang hrang an lo kal a, tuai/patil leh transman, transwoman te pawh an lo kal kim vek thin a, an hnen atang chuan tam tak ka in zir chhuak zel bawk a. Kei ma nuna ka lo pawm thindan leh Pathian thu chungchanga rinna ka lo neihdan zawng zawng kha min rawn nem nghehsak ni ber hian ka hria a. Chuta tang chuan scientist tena tuai leh patil chungchanga research an lo neihna te ka chhiar zela, keima nun nena in mil zel a ni bawka, kan duh thlanna a nih lohzia leh he tianga piang hrim hrim kan nihzia te ka chhiar zela, ka nuna awm dan nen a in mil thlap thlap zel mai a ni. Chutih lai chuan bible lama tuai/patil chungchang thu ah knowledge ka la nei lo hrim hrima, piangthar/ chhandam fa ka nih tawhna tanga ka fiah leh chian em em nun a nih vang chauhva huai taka ding ngam kha ka ni ve mai chauhva, bakah keima awmna community ah hrim hrim hian tuai/patil duh lo zawnga sawisel chiamna hi a awm zen zen loh avang hian Bible lam thu ah chuan ka la serious vak hran lo. Mahse Pathianin tul a ti a ni ang, Bible lama tuai/patil chanchin ni awm tak ziahna lanna te nen min in hmel hriat tir zel a. Min in hmelhriat tir dan pawh he ti hian a ni….

  

Tum khat chu kan biakin ah crusade kan nei a, patil pakhat hian thu a lo zir ve ziah thin a, Sunday inkhawm lai hian speaker chuan pulpit tlang atang chuan patil hming chu a rawn lama, “he tiang ho hi Pathian thu an hriat loh vanga hetianga awm an ni,” a rawn ti hlawl mai a, mipui ho lah an nui dar dar a, kil khatah hian ka rilru a lo na em em a, Pathian hnenah ka tawngtai hiala, “engvanga hetianga mi te nuihzat atana min piantir nge I nih?,” ka ti a. Chutih rualin ka rilrua rawn lang chu hriat chian leh zual duhna hi a ni a, “Lalpa mi hriatchian tir rawh,” ka ti leh a. Chu ta tanga nihnih hnuah chuan ka facebook ka hawnga, fb ah hrim hrim hian Sap gay Christian te page hi ka follow a, an thil post te chu en thin mah ila comment hi ka en vak ngai lo va, a chhan chu inhnialna hi a tam thin em avangin ka peih lo va, mahse chu mi ni berkher kha chu comment hi chhiar ka chak em ema, “kan en ve chin re re a nge,” ka ti a, ka en a, ka mamawh tak mai link pakhat gaychristian101.com  hi mi pakhat hian a lo post a, ka han en chu Bible chhunga inziak tuai/patil duh lohna anga min lo zirtir thin zawng zawng a tawngbul atang leh an hunlaia an chanchin awmdan atanga chhuizauna hi a lo ni a. Ka lawm em em a, Pathianin ka tawngtaina min chhang a nih hi ka ti a, lawmthu pawh ka sawi hial a. Fundamentalist ka nih angin Pathian thu an sawi hrim hrim hi ka hriat ngai loh thil leh danglam deuh hlek a nih tawh hi chuan ka pawm zawng an ni emaw, nilo emaw Bible zirtir dan nen a in mil em? tih hi ka en nghalin zirchianna ka nei leh vek zel a. Chu mi linka mi pawh chu Bible ah ka chhiar vek a, Bible zirtir dan leh a hunlaia an lo awmdan nena in mil vek hi a lo ni a, chu mi link a ziaktu ber pawh chu tunah hian kan in be thin fo va, pastor a ni nge nge bawk a. Tichuan Bible ah Isua ngeiin, born gay kan awm chungchang a sawina te ka chhiar fuh zel a,bible chhiar ve fo mah ila kha tiang  inziahna kha ka lo ngaihtuah chiang ngai kher kher thin lo va, mahse kha mi tumah kha chuan gay hawi zawnga bible ka chhiar vang pawh a nia nge, chhiar thin fo, ngaihtuah ngai loh born gay chungchang inziahna te nen kan lo in hmelhriat zela, ka ngaihtuahnaa rawn awm chu, “Pathian hian aigupta rama Isarelte hreawm tawrhna au aw avanga a awm hle hle theih loh ang khan hmuhsit leh tih duhdah nasatak tuar homosexual(tuai/patil) te hreawmna au rawl avang hian a awm hle hle thei tawh lo, a nih hi” ka ti a, ka lawm ru em em bawk a ni.

 

Pathian duhber chu mi zawng zawng in chhandamna chanchintha an lo hriata chhandama an awm hi a ni a(1Tim 2:4), chu mi chu straight te tan chauh a ni lo va, gay(patil/tuai) te tan pawh a ni a. Chu mi hril tur chuan Pathian hian min duh niin ka hria a. Theih ang tawk tawkin fb lam atang te, whataspp lam atang ten tan ka la ve a, Pathianin thlarau bo te pawh A thu kaltlangin min pe ve nual tawh a, a bikin straight zingah hian an tam zawk a. Homo(tuai/patil) ho tan hian chhandamna pawm mai hi an la harsata, a chhan chu kan tetlai atang tawha min lo zirtirdan ah chuan, “tuai/patil nihna hi duh thlanna avanga awm a nih avangin, an pianthar chuan tuai a ta straight ah an in let a ngai a, an in let loh chuan vanram an kai dawn lo,” tih rilruk kha an nei reng a, Pathian thu aiin mihringte min lo hrilh thin kha an la ring zawk a, chu mi avang chuan awih harsa an ti a, tuai/patil atang straight ah in let thei lo na na na chu chhandam ni ve lo leh, vanram kai ve lo tur ah an in dah hmiah mai a, kha kha Setana bumna lian tak a nih reng an hre si lo va, “he ti chung reng hian Pathianin min ngaidamin min chhandam ang maw,” hi an ti leh thin a. Awih harsa hi an ti em em thin a ni. Mahse Pathian thu duh deuh patil/tuai zingah pawh an awm ve nuala, a tirah hre thiam lo mahse a hnuah chhandamna chanchintha an hriat tawh avangin, Pathian thu nung chuan an nun ah a rawn ti fiah leh a, tichuan Isua chhandamna lawmawm, thil thlawn pek chu an lo pawm ve ta a, an pawm hnu chuan an nun hi a hahdam em em ringawt mai a ni. Ka hnena testimony ang zawnga rawn sawi leh te pawh an awm thin a, a hunlaiin min lo hnial nasa in min lo hmu kal sual viau thin mahse Pathian thutak chu engtik lai pawha dik zawk leh Setana ngam loh a nih miau avangin a tawp tawp ah chuan min hnialtu te pawn Pathian thatzia leh faknan an rawn hmang leh nge nge thin a ni. Lalpa ropui rawh se. Amen!

Kan topic ah lut leh ila, tuai/patil nihna hi sual a nih lohzia ka nuna chiang em em dan chu a chunga kan sawi zawng zawng te khaikhawmna atangin a rawn fiah mai a nga. Sawi tawh angin, kum 13 ka nih in ka piangthar a, chutih lai chuan homosexual(tuai/patil) ka nih leh nih loh ka la in hre lo va, ngaihzawng pawh ka la hre lo va, ngaihzawng ka rawn hriat hnuah chuan mahni anpui duh chi(homosexual) ka ni tih ka in hria a, miten sual leh dik lo, duh thlanna avanga hetianga anpui kawp anga an ngaihna, kan tetlai atanga min tuh tawh chu awihin inthlak tumin tan ka la a, nasa takin ka bei a, mahse a theih chuang loh va, straight ten mahni opposite sex te an duhna an tih reh theih loh ang chiah hian kei atan pawh a theih bik loh va, ka beidawnga, Pathian hnenah min lakkiansak turin ka dila, min lakkiansak chu sawi loh he tiang renga siam ka nih zawkzia hi min hrilhfiah tulh tulhin min zirtir zawk zela, NGO ka hnathawhna atang pawn min zirtir a, mahni leh mahni in pawm theihna min zirtir bawka, homosexual(tuai/patil) ka nih ka in pawm hnu atang ka buaina a bo va, midang mahni la in pawm theilo te tanpui tu ah Pathianin min siama, ka nuna ka lo experience tawh zawng zawng ka thlir let hian tuai/patil nih hi sual a nih lohzia leh straight te ang tho va hetianga siam kan ni ve tho, tih hi Bible atang pawha min zirtir a ni bawk tih hi ka hmu chhuak a(Mt 19:12). Pathian thil siam ropui tak hi a siam mihring te hian kan hre seng lo va, mihringah chauh pawh nilovin ramsa zingah pawh homosexual an tam hle bawk a. Ramsa zingah chuan homosexual haw tu an awm lova, mihring  zingah chiah hian kan awm a ni. Tuai/patil nihna hi kan duhthlanna a ni lo va, kan duh thlanna zawka chu tuai/patil huatna leh hmuhsitna zawk hi a ni, tih hi ka sawi duh bawk a ni.

Tuai/patil nihna hi sual a ni lo ka tih avangin bawrhhlawh taka sex hmanna ka thlawp vek, tihna a ni lo, tih kan hriat atan ka duh bawk a. Pathian min kaihhruaina atanga kei mah leh keimah ka in pawm theih hnu atang chuan ka ngaihzawng tur te hi Pathian hnenah ka hlan thlap thlap zela, “ka tana tha leh fel tur, nangmah tih mi min pe rawh,” ka ti thin a. Ka tawngtai ang chiah chiah chuan chhanin ka awm thin a. Ka nihna ang angin Pathian hnenah ka hrilh a, ka dil a, a nuamin a hlim awm em em bawk a. Pathian leh keima inkarah hian engmah in zep tur a awm lo va, thiantha angin ka bia a, ka rilru nat chang a awmin ka hrilh a, thil ka tih sualin ka hrilh a, ngaihdam ka dil a, a nuam em em mai a ni. Mihring bulah chuan kan rilrua awm zawng zawng kan sawi chhuak ngam thin lo va, Pathian hnenah erawh zep tur a awm lo va, zalen takin ka sawi a, ka rilru hahna te min chhawk em em bawk a ni. Ka homo pui te pawn Pathian hi in thiantha angin lo kawm ve tawh rawh u, A haw lo cheu va, in nihna ang ang khan a hmangaih cheu va, A ma siam in ni a, nangmah ni aiin a hrechiang zawk cheu a ni. Pathian lo, bel tur dang kan nei lo va, Pathian hnena in tukluh hi kan tana himna ber a ni. Miten hrethiam lovin sawisel che u mahse Pathian erawh chuan a hmangaih cheuvin a sawisel ngai ve lo cheu a ni. Hla takah i awm tawh pawh a ni mai thei, engtik lai pawn a hnena kir leh turin a nghak reng che a ni. “Ka Pa,” tia vawikhat I koh mai pawh kha A lawm em em, tih hi hre reng la. A hmagaihna che hi haider ngai suh.

Ka nuna ka thil tum ber chu chhandamna chanchin tha la hre lo te hnena chhandamna chanchin tha hrila, an lo hriata chhandama an lo awm ve hi a ni. Chu chu  Pathian duhber pawh a ni bawk a ni. A tawpber ah chuan, “homosexual(tuai/patil) nih  hi sual a ni lo va, straight te ang tho va Pathian min siamdan a ni”. LGBT chungchanga zawhna zawt duh te tan kan fb page MIZO LGBT CHRISTIANS kal tlangin emaw, email mizolgbt@gmail.com atang zawhna siam theih reng a ni e. Lalpan malsawm che rawh se. Amen!