MIN SAWISEL HMA HIAN KAN CHHUNGRIL A AU-AW HI MIN NGAIHTHLAKSAK NGAM VE EM?

Tunlai khawvela kan buaipui em em LGBT(tuai/patil) te chungchang hi kan ram, Mizoramah ngei pawh kan buaipui tan mek chu a ni a. Ram changkang zawkah chuan an nihna ve reng leh Pathian thil siam zinga pakhat, duh thlanna vang leh awm herh duh vanga he tianga awm an nih loh zia te, natna chikhat anga tih dam theih ang chi a nih loh zia te, Pathian siam ve ngei an nih zia te pawmin kohhran leh khawtlang te pawn an nihna ang anga an pawm mek laiin, kei ni hmanni lawka harh ve dek dek te hian tuai/ patil te tih reh tumin NGO thenkhat te nena hmalak te kan tum a. Tlema kan hawizau deuh chu a ngai niin a lang.

Tuai leh patil te hi mi tamtak (straight) te hian an duh vang renga he tianga awm emaw kan ti a, kan hmusita, kan tena, kan bula awm atan leh biakina hmuh ve atan pawh kan duh lo va, kan sawisel chiam avanga inthlak danglam thei tur ni awm tak hian kan sawisel chiama, fiamthu thawh nan leh nuihza siam nan kan hmang zui bawk a, Pathian zah lo tak Kristian in ti kan va ni tak em!! Pathian thil siam, Kristaa kan unau patil/tuai te nun chhungril hi kan zir chiangin hriat chian kan tum tak tak tawh ngai em? Biakin-ah te diklo taka Krista min chhandamna chanchintha min zirtir avanga gay/ patil mahni nunna la ta mai kan awm nual tawh tih te hi kan hre ngaiin kan ngaihtuah ve ngai em le? Mifel ber ni awm tak hian Pathian thu te hi pulpit ah leh camping naah kan au puia, thlaraubo nunna man lovin kan ti hlum zawk tih te hi kan hre ve ngai em le? Kristaa kan unau tuai leh patil te I sawisela nuihzat siam nana I hman leh hma khan an chhungrila au-aw hi I ngaithla hmasa ngam ve dawn em le?

11)      “In ti pa, in ti nu(tuai)”, min ti thin maw? Kan nihna lo anga in ti pa chiam leh inla nu(tuai) chiam kan ni emaw in ti thin a, khawlaiah pawh ni se min sel neuh neuh thin a, in mi sawiselna hi tawrh reng kan duh avanga hetianga awm lui leh awm herh kan ni lo a sin. Kan chhunglama kan nihna ang zawka in chei leh in thuam chhuak ve mai zawk kan ni. Nangni pawh hmeichhia(straight) ni si in mipa thawmhnaw in bel reng turin ti cheu se la, in thei bik a ngem le? Mipa(straight) ni siin hmeichhe thawmhnaw in bel reng turin ti cheu se la, in thei bik a ngem le? In duh hauh lo ang le! Mi sawisel hlawh tura hak chu sawi loh sawisel loh tur pawn in ha peih teuh nang!! Mahse tinge kei ni hian kan hak bik? Kan duh vang reng em ni? Kan duh vang reng ni sela chuan mi sawisel renga awm ai chuan an sawisel loh tur anga thawmhnaw hak chu kan duh ve tho a lawm. Min sawisel hma khan eng vanga he tianga mipui tam takte sawisel hlawh chung chunga ha nge kan nih tih hi in chhui hmasa ngai em le? Homosexual(tuai/patil) ho hian heterosexual(straight) nih chu kan chak ve a sin. Mahse siamtu min siam dan a nih miau avangin zak chung chungin tiang ang hian kan awm zawk a nih hi. Kan duh thlanna avanga he tianga awm ni ila in mi hmuhsit hma daih atang tawh khan kan in thlak danglam daih tawh ang chu! Tuai leh patil tia in mi sawisel hma khan kan chhungril au-aw leh eng vanga he tianga awm nge kan nih tih hi, hriatfiah hmasak tum ve tawh rawh u. A ruka kan trah nasat zia te hi in hre ve ngai em le? Khawvel finna a san tawh angin kan chanchin chu Scientist te pawn an chhui nasa tawh bawka, kan duh thlanna a nih loh zia in lo hre tawh a nga, Bible ah ngei pawh Isuan he tiang renga nu pum chhung atanga piang kan nih zia a sawi te chu in lo hre ve tawh dawn  nia(Mt.19:12). Chu mi zawhah chuah Kristaa in unau te hi kan duh vang renga hetianga awm kan nih loh zia in lo hre thiam ve tawh dawn a nia.

2)      “Tuai leh patil te chu vanram an lut ve dawn lo,” min ti thin maw? Vanram neitu chu Kristian te anga mi thleibik neilo Pathian ta a ni a, keini mihringte min hmangaih em em avangin A Fapa mal neih chhun pawh ui zo lovin min rawn chhandama, tupawh Amah ring chuan chatuana nunna a nei tawh, tia min hrilh laiin campingah leh Biakin atang speaker ten ti hian min au khum thin a, “ Tuai leh patil te hian Pathian ram an chang ve lo vang, Pathian thu an hriat loh vanga he tianga awm an ni, an awm dan an thlak loh chuan vanram an lut lo ang,” tiin tham lo tak leh dik lo takin Krista chhandamna chu min hrilh thina,  engmah la hre ngai lo tuai/patil ten, tak tak emaw tiin inthlak an tuma, mahse an thei si lo, Pathian duh loh ang leh hmangaih loh, meidil tla tur renga piang angah in ngaiin beidawngin mahni nun hial in la ta mai kan awm nual tawh a sin. Pawnlama lan dan hi kan tuai/patil nihna dik a ni lova, chhunglamah zawk kan nihna diktak thlak theih loh chu a awm reng zawka, straight i nihna I thlak theih loh ang chiah khan homo kan nihna hi thlak theih loh a ni ve tho a ni. Kan biological sex leh sexual orientation hriat hran loh avanga dik lo taka Pathian thu min zirtir avang hian kan unau nunna chan an awm tawh nuala, hetiang thil hi a thlen leh tur kan duh tawh lo takzet a sin. Kan tunlai speaker tamtak leh mipui tamtak hi chu kan tan chuan Isua hunlaia Pharisai te kha in ni ringawt mai. Krista chu ring ve duhin pan kan tuma, nangnin min lo hnar bawk si, nangmahni lahin Krista chhandamna a thlawna thilpek chu la duh lovin thawhchhuah in tum leh bawk si a, Isuan Pharisai te hnena, “Nangni lehkhaziaktu leh Pharisai vervek te u, in chung a pik e! vanram kawng chu mite in kharsak si thin; nangni lah in lut si lo va, mi lut turte pawh luh in phal thin hek lo, (Mt.23:13)” a tih te ang kha in ni ringawt mai. Pathian min hmangaihna chanchin ngaithla ve duhin biakin kan rawn pana, nangni chuan alien angin min lo en a, pulpit tlang atang nuihzat siam nan min hmanga, tu in nge Biakin ah chuan thu ngaithla tura lo kal duh tawh ang le? Kei ni chuan misual te hmangaihtu Krista chanchin leh Pathian thu ngaihthlak chakin kan lo kala, nangni erawh chuan thu kha tak tak min lo barh a, biakin pan lova kan awmna te hi a rei tawh a sin. Tu mawh nge? Pathian em ni? Ni lo ve! Pulpita au thum dur dur te leh mipui thenkhat te mawh a ni. Kan harsatna min hriat thiam tum lo leh tuam damsak tum in nih loh chuan sawisel pawh min sawisel tawh suh u, kei ni chuan min hmangaihtu Isua chu kan awm hmun atang kan bia in kan fak ve tawh zawk mai ang!

3)     “Homosexual(tuai/patil) ho chu ka ten,” min ti maw? Tuai kan nih vang ringawtin mipa kan hmuh na zawng kan duh bik lova, patil kan nih avangin hmeichhia kan hmuh na zawng kan duh bik lo. Straight I nih avang khan I opposite sex I hmuh na zawng kha I duh bik em le? I duh bik lo, duh zawng te, duh loh zawng te I nei a ni lawm ni? Nangmah ang chiah kha kan ni ve tho a sin. Homosexual(tuai/patil) kan nih avang hian same sex na zawng hian min duh chuang bik lo va, homosexual zinga  tu emaw nen tum vang reng nilovin relationship ah kan awm ve mai zawk a ni. Straight I ni a, I opposite sex na zawng khan an duh bik hauh lo che, straight dang zinga I duh tur nen tum loh deuhvin in in hmua, in in duh ve mai zawk thin a ni lawm ni? Danglamna eng nge kan neih vak chuan le? Tuai leh patil kan nih avang hian khawlo viau turah min ngai ringawt suh u. Kei ni pawn straight in nih avangin hmusit hmang vek turah kan ngai chuang lo che u. Min sawisel hma hian kan nun hi zir chiang ngam ve zawk turin kan ngen duh cheu a ni.

4)     Kristian te kan duh lova Isua erawh kan duh: Kristian te chuan min hmusita, fiamthu thawh nan leh nuihza  siam nan min hmanga, min tuithlara, vanram kai lo turah min dah bawk a, mahse Krista chuan min hmuhsit ngai lova, min en hrang ngai lova, kan nihna ang angin min hmangaiha min chhandama, Amah ringtu kan nih avangin van hmunah hmun min pe ve a, Ama roluahpuitu ah te min siam a, Krista ringtu kan ni ve hi kan lawm em em zawk a ni. Kristian te kan duh lova, Krista erawh kan hmangaih a ni, Aman min hmangaih hmasak avangin. 

Straight, Kristaa kan unau te u, kan harsatna leh kan nihna dik min hriat thiam puia min tanpui dawn lo a nih chuan min hmusit tawh lovin min sawisel lo ngam mai rawh u. Sawiseltu leh hmusit tu kan mamawh lova min hmangaihtu tur kan mamawh zawk a ni. Krista hnungzuitu dik tak Kristian kan duh zawk a ni. Pharisai Kristian kan mamawh lo. Pathian hmangaihna leh chhandamna thutak Bible zirtirna anga zirtirtu Kristian kan mamawh zawk a ni. Kan chhungrila harsatna au-aw hre hmasa lovin min sawiselin min hmusit ve ngawt tawh suh u. Pathianin a hmangaih che u ang tho khan kei ni pawh Kristaah in angkhatin min hmangaih ve tho a ni, min hrethiam dawn lo a nih chuan, min sawisel lo ngam ve mai rawh.